Pormal nga gideklarar sa Cebu City Council ang Biyernes, Enero 16, 2026, isip Day of Mourning isip paghatag og dakong pag-ila ug pakighiusa sa kasubo sa mga pamilya ug komunidad nga naapektuhan sa landslide sa Barangay Binaliw nga misangpot sa pagkawala sa daghang kinabuhi.
Ang maong deklarasyon gipahigayon pinaagi sa usa ka corollary motion nga nag-amendar sa resolusyon nga gisugyot ni Councilor Joel Garganera. Pinaagi niini, gipadayag sa konseho ang ilang pinakalalom ug tinuoray nga pahasubo ngadto sa mga pamilya sa mga biktima sa trahedya.
Sumala sa mga miyembro sa konseho, ang pagdeklarar og Day of Mourning usa ka simbolo sa panaghiusa sa lokal nga kagamhanan ug katawhan sa Cebu City sa pag-atubang sa kasubo. Kini usab usa ka paagi sa paghatag og panahon sa katawhan aron sa paghinumdom ug pag-ampo alang sa mga namatay.
Isip kabahin sa mga kalihokan sa maong adlaw, gihangyo sa konseho ang Office of the Mayor nga mag-organisar og Holy Mass sa Barangay Binaliw Gymnasium. Gilauman nga motambong ang mga pamilya sa biktima, mga opisyal sa siyudad, ug mga residente isip pagpakita sa hiniusang pakighiusa ug pag-ampo.
Samtang nagpadayon ang mga lakang sa relief ug rehabilitation sa Barangay Binaliw, nagpasalig ang Cebu City Government nga magpadayon sa pagtabang sa mga naapektuhan. Gidani usab ang publiko nga magpakita og respeto ug pakig-ambit sa kasubo sa tibuok siyudad atol sa Day of Mourning.
I via Renante Socia Lada