Gisiguro sa mga opisyal sa Coast Guard District Central Visayas (CGDCV) ang kahapsay ug kaluwasan alang sa Sinulog Fluvial Parade karong Enero 18, 2025, diin 194 ka mga rehistradong sakyanan pang-dagat ang moapil.
Ang parada magsugod alas-6:00 sa buntag sa Captain Veloso Port, Navforcen, ug magtapos alas-8:00 sa buntag sa Pier 1.
Gahapon, gihimo ang site inspection sa Cebu-Mactan Channel nga gipangulohan ni Commodore Weniel A. Azcuna, Commander sa CGDCV, aron ma-assess ang ruta sa fluvial procession. Sumala sa opisyal nga pahayag sa CGDCV:
“The inspection covered critical points along the Cebu-Mactan Channel, including the parade’s starting and endpoint, to ensure the safe and smooth conduct of the event. The activity aimed to evaluate navigational conditions, confirm safety compliance, and strengthen coordination with partner agencies and stakeholders.”
Ang mga sakyanan pang-dagat giawhag nga sundon ang maritime safety guidelines, lakip na ang 6-8 knot speed limit aron malikayan ang aksidente ug masiguro ang kaluwasan sa tanan nga moapil.
Ang Sinulog Fluvial Parade usa ka mahinungdanong bahin sa pista sa Señor Santo Niño nga naghulagway sa relihiyosong debosyon ug kultura sa mga Sugboanon. (Renante Socia Lada)