Usa ka makasubo nga insidente ang nahitabo sa Barangay Kauswagan, Trinidad, Bohol, niadtong Oktubre 5, 2025, dihang duha ka batan-ong lalaki ang namatay ug tulo pa ang naangol human sila maigo sa kilat samtang nagluto og manok alang sa ilang panihapon.
Ang mga biktima giila nga sila Joebert Lumicday, 21, ug Mark Zorend Butal, 21, managsilingan ug mga kanhi estudyante sa Kauswagan National High School. Sumala sa inisyal nga imbestigasyon sa Trinidad Municipal Police Station, nagtapok ang lima ka higala sa usa ka payag taliwala sa umahan aron magluto sa ilang sud-an sa dihang kalit lang nga mikilat ug sila naigo.
Luwas nga nakalingkawas apan adunay minor injuries ang ilang tulo ka kauban nga sila Lemuel Estorgio, 23; Nelo Racines, 20; ug Ramces Roscual, 24. Ang tulo maoy midangop sa barangay kapitan nga si Nicanor Rogalada, kinsa dayon mitabang ug midala sa duha ka biktima sa San Miguel District Hospital, apan gideklarar kini nga Dead on Arrival (D.O.A.) tungod sa grabe nilang paso ug samad.
Matod pa sa mga nakaluwas, tungod sa kakusog sa kilat, nangalagpot sila gikan sa payag ug bisan ang manok nga ilang giandam para sa panihapon naapil usab ug kamatay.
Sa wala pa ang insidente, PAGASA-Bohol nakapagawas na og thunderstorm advisory nga nagpasidaan nga adunay pagdugdog ug kilat sa maong dapit. Ang mga otoridad karon nagpasidaan pag-usab sa publiko nga likayan ang pagpundo sa bukas nga lugar kon adunay kilat ug pag-ulan aron malikayan ang susamang disgrasya.
I via Renante Socia Lada