Mikalas og duha ka motorcycle riders human maligsian sa usa ka trailer truck sa South Road Properties (SRP), Barangay Mambaling, pasado alas 11:00 sa buntag, Agosto 29, 2025.
Ang mga biktima mao si Romiel Gapate, 31 anyos nga drayber sa motorsiklo, ug si Stephanie Zundit, 21 anyos nga angkas, nga kapuyo sa igsuon sa drayber. Sumala sa pulis, duha ka biktima ang nakaangkon og grabe nga kadaot sa lawas nga hinungdan sa ilang kamatayon.
Sa imbestigasyon sa Traffic Enforcement Unit sa Cebu City Police Office (CCPO), ang motorsiklo ug ang trailer truck nga gi-drive ni Noreno Santarita, 48 anyos, nagpadulong sa parehas nga direksyon dihang niliso ang motorsiklo padulong sa inner lane ug didto naigo sa trak.
Tungod sa impact, nawad-an og kontrol si Gapate sa motorsiklo ug natumba. Ang duha ka biktima nalabay sa dalan ug nalatayan pa gyud sa trailer truck. Si Zundit kuno dalhon unta ni Gapate sa mall nga iyang gitrabahuan sa wala pa mahitabo ang disgrasya.
Si Santarita, drayber sa trailer truck, gidakop sa kapulisan ug karon gi kustodiya samtang nagpaabot sa kasong reckless imprudence resulting in double homicide and damage to property.
I via Renante Socia Lada