Gitugaw ang adlaw sa duha ka Unibersidad sa dakbayan sa Sugbo human nakadawat sila og hulga sa pagpamomba, kagahapong adlawa Oktobre 21, 2024. Ang Cebu Technological University (CTU) main campus ug ang Cebu Institute of Technology University (CIT-U) nikanselar sa tanang klase human makadawat og managlahing hulga.
Unang miresponde ang kapulisan sa CTU main campus human makadawat og bomb threat alas 6 sa buntag. Matod sa mga opisyal sa eskwelahan, natingala sila nga ang opisyal nga Facebook account sa CTU gi-tag sa usa ka post nga adunay hulga sa bomba.
Sa Facebook post, detalyado ang hulga uban ang mga hulagway sa mga bomba nga gikatahong gikuha gikan sa Internet. Segon pa sa nagpost sa social media nga ila na nabutang ang bomba og human sa lima ka oras moboto na kini.
Ang Cebu City Police Office nakig-alayon sa Bureau of Fire Protection ug sa Cebu City Disaster Risk Reduction Management Unit aron masiguro ang kaluwasan sa mga tinun-an, magtuutdlo ug mga tawo sa maong lugar.
Ang Explosive Ordnance Disposal (EOD) team, ubos sa pagpangulo ni PLT JOEL TABOADA lakip na ang CCPO SWAT Team, gipadala ngadto sa mga dapit aron sa paghimo og makuting inspeksyon ug paghawan sa palibot sa bisan unsang posibleng hulga.
Gikondena sa Cebu City Police Office ang maong binuhatan, nga niingon nga ang maong mga hulga nagtumong sa pagpukaw sa kagubot ug kalisang sulod sa komunidad. Ilusad ang hingpit nga imbestigasyon aron mailhan ang indibidwal nga nagpaluyo sa social media account nga ginganlag “John Steve,” nga gidudahang nalambigit sa mga hulga.
Gipahinumdoman ang publiko nga ang mga bomb joke ug mga hulga seryoso nga mga kalapasan.
Kadtong responsable mahimong mag-atubang ug grabeng mga sangpotanan, lakip ang sentensiya nga pagkabilanggo hangtod sa lima ka tuig ug multa nga ₱40,000.00, nga nagpasiugda sa legal nga mga sangpotanan nga nalangkit sa maong mga aksyon. (Renante Lada)