Sikop ang duha ka mga lalaki kinsay maoy suspek sa pagpatay sa usa ka 66-anyos nga lolo sa Barangay Calangang, lungsod sa Badian Sugbo. Human sa hot pursuit operation nga gipahigayon sa mga kapulisan inabagan sa Station 3, Mandaue City Police Office kagahapon pasado alas 5:00 sa buntag, Hunyo 30, 2024.
Ang nasikop nga mga suspek nagpangidaron og 18 ug 24 anyos, kahinundoman nga niadtong Hunyo 28, 2024, ang mga suspek, kinsa gikatahong lango sa ilimnong makahubog, nakadasmag og kanding samtang sakay sa motorsiklo sa Barangay Calangcang, Badian, Sugbo.
Tungod sa kasuko sa kadaot sa ilang motorsiklo, ilang gipangayo nga bayran sila sa tag-iya sa kanding ug ang anak sa biktima nipatunga ug nisugyot nga sulbaron ang maong butang sa barangay. Pagkagabii, mga alas 7:30 sa gabii, nibalik sa lugar ang mga suspek. Imbes malinawon nga sulbaron ang isyu, nibunot silag armas ug gipusil ang biktima. Human sa maong krimen daling misibat ang mga suspek ug gibiyaan ang biktima.
Gidaling gidala ang biktima sa Badian District Hospital apan gideklarar sa mga doktor nag atiman nga patay na.
Kasong murder ug paglapas sa Comprehensive Firearms and Ammunition Regulation Act ang atubangon karon sa mga suspetsado. Ang duruha Kasamtangang gitanggong sa Badian Custodial Facility ug nagpaabot sa pormal nga kaso. (Ting Joe Pepito | Renante Socia Lada)