Dali na gi respondihan sa kapulisan sa Carcar City Police Station ang kalit nga pagpamusil sa usa ka 34-anyos nga lalaki nga nahagba gawas mismo sa ilang panimalay niadtong Abril 23, 2025.
Wala damha nga ig-agaw ra diay sa biktima ang suspetsado nga usa ka 33-anyos nga negosyante nga giilang si James Alegarbes, taga Guadalupe, Carcar.
Gikauban ni Alegarbes ang drayber sa motorsiklo nga si Jenro Eliorda, 32-anyos, nga taga Barangay Napo. Ang duha nadakpan sa kapulisan pinaagi sa kusog nga hot pursuit operation human masuta ang ilang pagkatawo gikan sa mga CCTV footages.
Sa report sa Carcar Police, nadawat nila ang impormasyon kabahin sa kasamok sa Proper, Barangay Bolinawan. Pero pag-abot nila sa lugar, ilang naabtan nga patay na si Natchumi Dayondon — ig-agaw mismo sa suspetsado.
Nasayran sa inisyal nga imbestigasyon nga adunay daan nga panagbangi ang manag-agaw, ug giingong kini maoy nag-ugat sa brutal nga krimen. Apan gitutokan pa karon sa kapulisan ang mas lawom nga motibo sa hitabo.
Giduso na karon ang mga kasong Murder, paglapas sa RA 10591 (Comprehensive Firearms and Ammunition Regulation Act), ug paglapas sa Comelec Gun Ban batok sa mga nadakpan.
📸 CPPO
I via Renante Socia Lada