Pulos nakalas ang duha ka mga pasahero sa usa ka insidente sa dunggab nga nahitabo pasado alas-9:00 sa gabii, Sabado, Disyembre 28, 2024, didto sa Barangay Ibo, Dakbayan sa Lapu-Lapu.
Ang usa sa mga biktima mao ang usa ka 42-anyos nga babaye nga residente sa Dakbayan sa Lapu-Lapu, nga naka-angkon ug unom ka samad sa dinunggaban sa nagkalain-laing parte sa iyang lawas. Ang suspetsado mao ang iyang bana, usa ka 44-anyos nga residente sa Lungsod sa Consolacion.
Segon ni PLtCol. Christian Torres, tigpamaba sa Lapu-Lapu City Police Office, ang magtiayon dose ka tuig nang nagbuwag ug lahi-lahi na og pinuy-anan.
Bisan pa niana, giingon nga ang bana nagpadayon sa pagsunod-sunod sa iyang asawa bisan ug buwag na sila.
Sa gabii sa insidente, nagsakay ang babaye og modern jeep gikan sa Dakbayan sa Mandaue padulong sa Siyudad sa Lapu-Lapu. Naglingkod siya sa atubangan sa jeep samtang ang suspetsado anaa sa luyo.
Sa pag-abot nila sa dapit sa Barangay Hall sa Ibo, gidool sa suspek ang iyang asawa ug gidunggab kini sa daghang higayon.
Ang ikaduhang biktima, usa ka 53-anyos nga tomboy nga pasahero sa jeep, nasamdan ug namatay usab human mapagan sa dunggab atol sa insidente.
Human sa pagdunggab, nilayat ang suspetsado gikan sa jeep ug nisibat, apan nadakpan kini sa kapulisan pinaagi sa hot pursuit operation pipila ka oras ang nakalabay.
Ang suspetsado mag-atubang karon og kasong parricide alang sa kamatayon sa iyang asawa samtang gitun-an pa ang pagpasaka og dugang kaso alang sa laing biktima nga namatay. (Renante Socia Lada)