Duha ka mga managsoon nga nagdumala og quarry operation ang namatay human gipamusil sulod mismo sa ilang compound sa Purok 1, Barangay Tanghaligue, Talibon, Bohol, niadtong niaging gabii.
Ang mga biktima giila nga sila si Gerry Lou Tan Dulang, 42 anyos, ug iyang manghud nga si Gerry Louis Tan Dulang, 36 anyos. Pulos sila ulitawo apan adunay mga live-in partners. Matod sa report, pasado alas-7 sa gabii gipusil sila sa wala mailhing mga suspetsado.
Daghang samad pinusilan ang naangkon sa duha, ug usa kanila gipusil pa gyud sa ulo nga maoy hinungdan sa ilang diha-diha dayon nga pagkamatay.
Si PMaj. Romar Labasbas, hepe sa Talibon Municipal Police Station, nagmando na og hugot nga imbestigasyon aron matumbok ang responsable sa maong krimen.
Ang pamilya Dulang nailhan sa ilang negosyo sa quarry sa Talibon ug Getafe. Nahinumdoman usab nga ilang amahan, nga kanhi konsehal sa Talibon, gipusil patay niadtong 2013 samtang nagpasubli pagdagan sa pinili-ay.
I via Renante Socia Lada