Nikutlo og duha ka mga kinabuhi ang nahitabong pagpamusil sa managlahing lugar ug oras didto sa siyudad sa Toledo.
Ang unang pagpamusil nahitabo didto sa Sitio Bulahan, Brgy. Carmen, dakbayan sa Toledo, niadtong buntag sa Hulyo 31, 2024.
Ang biktima giila sa Toledo City Police Station na mao si Engr. Fedilino Adao Tinapay, 82 anyos ang panuigon, ulitawo, ug residente sa Barangay Sangi, siyudad sa Toledo, Sugbo.
Sa imbestigasyon sa kapulisan nasayran nga samtang naglingkod ang biktima sa iyang payag gipsil kini sa wala naila nga mamumuno nga daling nisibat human nabuhat ang maong krimin.
Ang ikaduhang pagpamusil nahitabo kadlawon sa Agusto 1, 2024, didto sa Sitio Cadigay Apid, Brgy. Cantabaco, dakbayan sa Toledo.
Ang biktima naila nga mao si Fritzkim Cabungcal , hingkod ang panuigon, taga Brgy. Lutopan sa mao ra nga dakbayan.
Sa imbestigasyon sa kapulisan nahibaw-an nga samtang luwan sa motorsiklo ang biktima gisundan kini og gipusil sa nagkadaiyang parti sa lawas na maoy hinungdan sa iyang kamatayon.
Sa duha ka pagpamusil sa maong dakbayan nagpadayon pa ang kapulisan sa ilang imbestigasyon aron pag ila sa mga mamumuno ug unsay mga motibo niini. (Renante Lada and Ting Joe Pepito)