Nakapukaw og kabalaka sa komunidad ang duha ka lahi nga drug operations sa Bohol human duha ka magtutudlo, usa ka maestra sa Tagbilaran ug usa ka maestro sa Corella ang nasikop sa kapulisan tungod sa iligal nga drugas.
Sa Tagbilaran City, nadakpan ang usa ka licensed teacher nga si Rica Mae Namocatcat, 29 anyos, kauban ang iyang uyab nga si Carlo Galinato, 29 anyos. Ang duha gisikop sa buy-bust operation sa Barangay Bool niadtong Nobyembre 14, Biyernes sa gabii. Si Galinato maoy target sa operasyon, samtang nadakpan usab ang maestra nga kuyog niya.
Nakuha gikan kanila ang 5 gramos nga shabu nga nagkantidad ₱34,000, human makapalit ang usa ka poseur buyer. Ang operasyon gipanguluhan ni PLTCOL John Kareen Escober sa Tagbilaran City Police Station.
Samtang sa laing operasyon sa Coralla, nasikop usab ang usa ka high school teacher nga si Jeffrey Inquito sa Barangay Anislag. Si Inquito, nga pirmi nang nalista sa drug watchlist, nasikop sa buy-bust operasyon nga gipangulohan mismo sa hepe sa Corella Municipal Police Station nga si PCPT Janice Parcon.
Nasakmit gikan kang Inquito ang 0.3 gram nga shabu nga nagkantidad og ₱2,050 base sa standard drug price.
Ang duha ka edukador, uban sa usa nila ka kauban, pulos nang nag-atubang sa kaso ilawom sa Republic Act 9165 o Comprehensive Dangerous Drugs Act of 2002.
Nagpahinumdom ang kapulisan nga walay exempted sa balaod bisan pa man ang mga nagserbisyo sa edukasyon ug padayon silang magpahigayon og operasyon aron mapadayon ang kahapsay ug kalinaw sa probinsya.
Source: Bohol PNP
I via Renante Socia Lada
