Duha ang patay ug usa ang naangol sa pagpamusil nga nahitabo pasado alas-11:00 kagabii, Nobiyembre 24, 2024, didto sa National Highway, Barangay Mangga, lungsod sa Tuburan.
Ang mga biktima nga namatay giila sa Tuburan Police Station na mao sila si Arnold Amansing, hingkod ang panuigon, nga nagpuyo sa Purok Bayabas, Brgy. Canjulao, Lapu-Lapu City, ug Joey Atienza Tan-awon, alyas ‘Gagang,’ nga taga-Daanlungsod, Tuburan.
Ang drayber sa motorsiklo nga si Jecar Sebas Rosalejos, 37-anyos nga taga-Sitio Tahusan, Brgy. Mangga, Tuburan, ang naangol ug padayon nga ginatambalan sa ospital.
Base sa imbestigasyon, ang mga biktima gikan sa usa ka derby sa Tuburan. Sa dihang paingon sila na mosakay sa habal-habal nga gimaneho ni Jecar, kalit silang gipamusil sa mga wala mailhing suspetsado nga nagsunod sa lain nga motorsiklo.
Gidala pa sa tambalanan silang Arnold ug Joey apan gideklarar nga dead-on-arrival.
Padayon karon ang imbestigasyon sa kapulisan aron masuta kung unsay hinungdan sa insidente ug matumbok ang mga responsable sa krimen. (Renante Socia Lada)