Nahimong maduguon ang Dominggo sa kadlawon, Oktobre 20, 2024, human nikalas og tulo ka kinabuhi ug duha ang naangol sa disgrasya sa kadalanan.
Didto kini nahitabo sa Barangay Road corner Valladolid, dakbayan sa Carcar.
Ang mga nakalas giila sa Carcar City Police Station na mao sila si Ian Flores, 21-anyos ang panuigon, Klaudet Powao Tobilla, 22-anyos ug Ronel Medina, 23-anyos ang pangidaron, samtang angol usab nga anaa sa talandugon ang kahimtang silang Alison Jose Santos, 27-anyos, taga Guadalupe Carcar ug Axel Dela Cerna, 18-anyos.
Lakip nga naangol mao si Trisia Nicole Monter, 22 anyos ang panuigon ug Rob Joseph Orias, hingkod ang panuigon.
Basi sa pasiunang imbestigasyon sa kapulisan sa maong dakbayan nasayran nga unang nagbangga sila si Flores ug Santos sa maong lugar.
Nitabang si Trisia Monter nga niagi atong higayuna nga wala nila damha nga madasmagan sila sa kusog nga nagpadagan nga pribadong sakyanan.
Gipangdaro ang mga biktima nga ni resulta sa kamatayon sa tulo ug pagka angol sa mga kaubanan niini.
Sa pagkakaron padayong gitanggong ang drayber sa pribado nga sakyanan nga mao si Orias samtang nagpadayon pa ang dugang imbestigasyon niini. (Renante Lada and Ting Joe Pepito)