Nasikop sa usa ka buy-bust operation ang usa ka delivery rider nga gituohang nag-sideline og pagpamaligya og ilegal nga drogas kagabii Enero 4, 2025, sa Sitio Dumpsite, Barangay Inayawan, Cebu City.
Ang dinakpan mao si Lorenz Uy Jurado, 29 anyos, ulitawo, ug residente sa Barangay Duljo Fatima, Cebu City. Si Jurado gihulagway isip usa ka High Value Individual (HVI) sa Regional Level.
Nakuha gikan kaniya ang 825 gramos nga gituohang Shabu, nga adunay standard drug price value nga Php5,610,000.00.
Ang operasyon gipahigayon sa mga sakop sa Inayawan Police Station alas 11:45 sa gabii, diin gisikop si Jurado sa aktong pagpamaligya sa ilegal nga droga.
Si Jurado mag atubang karon sa kaso ilawom sa Section 5 (Pagpamaligya sa Droga) ug Section 11 (Paghupot sa Droga) sa Article II RA 9165 o Comprehensive Dangerous Drugs Act of 2002.
Sa pagkakaron padayon ang imbestigasyon aron masuta kung si kinsa ang supply sa ginadiling drugas sa dinakpan. (Renante Socia Lada)Â