Patay ang usa ka custom broker human kini pusila sa wala mailhing riding-in-tandem sa Sitio Bukid-Bukid, Barangay Pajac, Lapu-Lapu City, pasado alas 8 sa gabii, Pebrero 4, 2026.
Ang biktima giila nga si Jaylee Tayong, 41 anyos, residente sa Barangay Yati, Liloan, Cebu. Matod sa kapulisan, ang biktima nagtrabaho isip custom broker ug nagmaneho sa iyang motorsiklo sa dihang nahitabo ang insidente.
Sumala sa inisyal nga report, gisundan ang biktima sa duha ka tawo sakay og motorsiklo. Sa wala damha nga higayon, gipusil ang biktima, hinungdan nga kini natumba ug wala na makabangon.
Gidala pa sa tambalanan ang biktima, apan gideklarar nga dead on arrival tungod sa mga samad nga iyang naangkon. Wala pa matino sa kapulisan ang motibo sa krimen, ug padayon pa ang imbestigasyon aron masuta ang tinuod nga hinungdan sa pagpamusil.
Karon, nagpadayon ang Lapu-Lapu City Police Office (LLPO) Police Station 2 sa pag-backtrack sa mga CCTV camera sa maong lugar aron mailhan ang suspek, ang motorsiklo nga gigamit, ug ang dalan nga gisibatan human sa krimen.
Gihangyo usab sa kapulisan ang publiko nga motabang pinaagi sa paghatag og impormasyon nga makatabang sa paspas nga pagdakop sa mga responsable sa krimen.
I via Renante Socia Lada