Nibalik na sa paglihok ang Cebu Provincial Sports Commission (CPSC) ug karon nagplano nga mapaspasan ang pagpatuman sa mga programa sa sports ug wellness sa tibuok probinsya sa Cebu. Tumong niini nga mas maengganyo ang kabatan-onan sa pag-apil sa sports ug mapalambo ang ilang panglawas.
Nagpahigayon og unang meeting ang komisyon niadtong Huwebes, Abril 16, sa Kapitolyo human sa hapit pito ka tuig nga wala kini naglihok. Usa sa mga bag-ong miyembro, si commisioners Paul Jake Castillo, miingon nga kinahanglan dali ang ilang aksyon ilabi na kay ting-init na ug daghan estudyante ang bakante, maong angay kini nga panahon para sa mga kalihokan sa gawas.
Ang CPSC gipangulohan ni Dr. Rhoel James Timothy Dejano ug giubanan ni Board Member Loren Singco isip vice chair. Sumala ni Dejano, nagsugod pa sila sa pag-organisar kay bag-o pa ang tanan miyembro sa komisyon.
Gipaabot ni Gobernador Pamela Baricuatro nga ang komisyon magpatuman og mga programa sa sports ug wellness nga makatabang sa mga residente, labi na sa kabatan-onan. Apil sa plano ang pagpadala og mga coach ngadto sa lain-laing lungsod ug siyudad aron matudluan ang mga batan-on.
Bisan wala pa ma-finalize ang tanang programa, giila nga posibleng tutokan ang basketball, volleyball, football, pickleball, dancesports ug athletics—mga dula nga apil usab sa CVIRAA ug Palarong Pambansa.
Ang CPSC gitukod pinaagi sa Cebu Provincial Ordinance No. 2014-01 niadtong 2014 ubos sa administrasyon ni kanhi gobernador Hilario Davide III, apan nahunong ang operasyon sulod sa unom ka tuig hangtod gibanhaw kini karong tuiga sa kasamtangang administrasyon.
Source: Cebu Province PIO
I via Renante Socia Lada