Andam nang modawat ang Cebu Provincial Hospital–Balamban (CPH Balamban) og bag-ong anesthesia machine nga idonar sa Syntech Properties Inc., usa ka property developer nga nag-operate sa maong lungsod sa midwest Cebu.
Gikumpirmar ang donasyon atol sa courtesy visit ni Janice Ngiam, director sa Syntech Properties Inc., kang Governor Pamela Baricuatro niadtong Miyerkules, Disyembre 3. Kuyog niya sa pagbisita sila Jesus Alao Jr., general manager sa Syntech; Melder Relator, marketing director; Dr. Olivia Dandan, chief of hospital sa CPH Balamban; ug Dr. Nikki Catalan, piso health consultant sa Kapitolyo.
Ang anesthesia machine usa ka medical device nga gigamit sa operasyon aron mapabiling walay sakit ug tulog ra ang pasyente samtang luwas ang pagginhawa. Kini mopagawas og kontroladong kombinasyon sa oxygen, anesthetic gases, ug uban pang agents, samtang naglikay nga mabalik ang carbon dioxide nga makadaot sa lawas.
Gawas niini, adunay mga monitor ug safety systems ang maong makina nga motan-aw sa vital signs sama sa pagginhawa ug heart rate, aron makareact dayon ang medical staff kung adunay kalit nga kabag-ohan sa kondisyon sa pasyente.
Sumala ni GM Alao, ang anesthesia machine nga nagkantidad og ₱2.5 milyon kay usa ka high-quality nga produkto gikan sa Germany ug adunay after-sales support ug maintenance gikan sa supplier. Gitakdang moabot ang ekipo karong Disyembre 11 ug pormal nga i-turn over sa CPH Balamban inig sunod adlaw.
“Since healthcare is something we truly lack compared to other countries, and because it is also a priority of our Governor, we decided to help,” matod ni GM Alao, nga ang maong donasyon kabahin sa corporate social responsibility sa Syntech.
Gideskripsyon ni Dr. Dandan nga timely ug importante kaayo ang donasyon. Iyang gisulti nga ang Level II hospital nga gi-accredit sa DOH, karon adunay usa ra ka anesthesia machine. Uban sa plano nga pag-abli sa tulo ka operating rooms—duha para general surgery ug usa para OB-GYN—dako kaayong tabang ang dugang nga makina aron mapaayo ang serbisyo.
“It will help us in our services; mas daghan na ang atong ma-cater at the same time,” matod ni Dr. Dandan. Dili na maghulat og dugay ang mga pasyente kay duha na ang anesthesia machines.
Iyang gidugang nga nisangpit na siya sa Kapitolyo alang sa ikatulo nga anesthesia machine, ug kasamtangan nga gisusi pa kini sa gobernador.
Source: Cebu Province PIO
I via Renante Socia Lada