Nakigkita si Mayor Nestor Archival sa nagkalain-laing transport groups sa Cebu City niadtong Marso 12, 2026 aron paminawon ang ilang mga problema tungod sa padayon nga pagsaka sa presyo sa gasolina ug diesel.
Sa maong panag-istorya, giingon sa mga representante sa transport sector nga daghang driver ang naglisod na sa ilang panginabuhi. Matod nila, taas na kaayo ang presyo sa krudo ug gasolina apan wala gihapoy pagtaas sa plitehan nga gitugotan sa Land Transportation Franchising and Regulatory Board.
Tungod niini, nangutana ang mayor sa mga transport group kung unsa nga klase nga tabang ang mahimo sa city government. Usa sa ilang gisugyot mao ang paghatag og fuel subsidy aron makatabang sa ilang gasto sa krudo. Nagkasabot usab nga mohatag ang mga grupo og lista sa mga driver nga mahimong makabenepisyo sa maong tabang.
Giingon ni Mayor Archival nga ila pang susihon ang lista sa mga driver uban sa LTFRB aron masiguro nga lehitimong driver ang makadawat sa tabang.
Human niini, makigkita usab siya sa City Treasurer aron tan-awon kung adunay pondo nga mahimong gamiton ug posibleng iapil sa supplemental budget sa siyudad. Sa pagkakaron, wala pa matino ang eksaktong kantidad sa subsidy nga ihatag.
Source: Cebu City PIO
I via Renante Socia Lada