SI Cebu City Mayor Raymond Alvin Garcia nagdasig ngadto sa mga bata ug uban pang naminaw atol sa iyang pagpamulong sa opening salvo sa pagsaulog sa Nobiyembre isip “Children’s Month”, nga gipahigayon sa Plaza Sugbo, sa atubangang bahin sa Cebu City Legislative Building, karong adlawa, Nobiyembre 9, 2024.
Matod sa Cebu City PIO nga niingon si Mayor Garcia nga ang gugma padahanon sa atong mga dughan dili lang karong buwana.
Kabahin niini, gitambag niya kanila nga dili tagdon ang kasikas nga bag-o lang nahitabo sa City Hall kundili mopadayon sa kalihokan ilabi nalang sa mga kabatan-onan.
“Ayaw na mo paminaw pa sa mga nahitabo sa unang panahon ilabi na gyud kagahapong adlawa. Let us move forward as a community, as a city that prioritizes sa atong kabatan-onan ilabi na gyud dinhi sa atong syudad sa Sugbo,” segon ni Mayor Garcia.
Ang opening salvo sa Children’s Month Celebration karong adlawa gitambongan sa usa ka libo ka mga bata gikan sa 17 ka mga centers dinhi sa siyudad sa Sugbo.
Gipasiugdahan kini sa Cebu City Commission for the Welfare and Protection of Children, nga pinangulohan ni Helen Francisco, ingon man sa Department of Social Welfare and Development sa City Hall. (Renante Socia Lada)
(Source: Cebu City PIO)