Gideklarar sa Cebu City Council ang tibuok siyudad ilawom sa state of calamity niadtong Martes, Enero 13, 2026, human daghang namatay sa insidente sa Binaliw landfill. Ang lakang gitumong sa paghatag og dali ug episyenteng tubag sa mga panginahanglan nga mitumaw tungod sa trahedya, lakip na ang problema sa garbage disposal.
Atol sa regular nga sesyon sa konseho, giaprobahan ang resolusyon nga gisugyot ni Majority Floor Leader Councilor Dave Tumulak, pangulo sa Cebu City Disaster Risk Reduction and Management Council. Walay niusang misupak sa maong resolusyon, nga nagtugot sa pagpagawas og ā±30 milyones gikan sa disaster fund sa siyudad.
Ang pondo kuhaon gikan sa Quick Response Fund (QRF) sa Local Disaster Risk Reduction and Management Fund alang sa 2026. Una kining gamiton aron matabangan ang gasto sa garbage disposal services human sa pagsira o limitadong operasyon sa Binaliw landfill, nga usa ka mahinungdanong pasilidad sa pagdumala sa basura sa siyudad.
Ang pagdeklarar sa state of calamity gibase sa Republic Act No. 10121, nga nagtugot sa lokal nga kagamhanan sa paspas nga paggamit sa disaster funds, pagpadali sa emergency procurement, ug implementasyon sa dinaliang response, rehabilitation, ug recovery measures sa panahon sa kalamidad o dako nga emerhensiya.
Sa resolusyon, giila sa konseho ang āgrabe ug makasubo nga insidenteā sa Binaliw landfill nga misangpot sa mga namatay, nasamdan, ug missing persons, ug naghulga sa kahimsog sa publiko, kaluwasan, ug kalikupan. Giila usab ang dakong epekto niini sa serbisyo sa basura ug sa kahimtangan sa tibuok siyudad.
Samtang, gidasig sa lokal nga liderato ang paspas nga pagdesisyon kabahin sa pinansyal nga tabang sa mga pamilya sa biktima. Ang maong isyu ipresentar sa Disaster Council ug Budget Office alang sa rekomendasyon sa sunod nga sesyon, samtang padayon ang panawagan sa konseho alang sa dali ug hiniusang aksyon sa tanang ahensya sa kagamhanan.
I via Renante Socia Lada