Segon sa Cebu City PIO nga malamposon nga mga Public Private Partnership (PPP) gipasigarbo ni Acting Mayor Raymond Alvin Garcia ngadto sa mga negosyanteng Malaysian nga nibisita sa siyudad sa Sugbo ug nakigkita kaniya kagahapong Oktubre 3, 2024.
Kini mao ang Cebu-Cordova Link Expressway nga mao ang kinatas-an ug kinahabogan karon nga taytayan lukop nasud nga gitukod sa Metro Pacific Investments Corporation ni Manny Pangilinan, ingon man ang NuStar Resort nga nahimutang karon sa kanhi Kawit Island sa South Road Properties.
Mga opisyal sa Cebu Chamber of Commerce and Industry (CCCI) nga gipangulohan sa presidente niini nga si Jay Y. Yuvallos ug bise-presidente nga si Melanie Ng maoy apil sa niabiabi sa mga bisita, nga mga sakop sa Malaysian Islamic Chamber of Commerce (MICC)-Selangor Branch.
Ang mga bisita gipangulohan sa Chairman sa MICC-Selangor Branch nga si Haji Mohid Yahya Bin Haji Mat Sahri.
Mahinungdanon ang papel sa ilang lugar nga Selangor kay gikaingon nga usa sa upat ka bahin sa Gross Domestic Product sa ekonomiy sa Malaysia gitampo sa Selangor.
Nipasalig sa mga bisita si Acting Mayor Garcia nga dili sila magmahay kung sila motukod og negosyo sa siyudad sa Sugbo.
“I will guarantee that you will have a very, very, very conducive place for investment if you will invest here in Cebu. I will support you and I will protect you at all cost”, paniguro pa ni Acting Mayor Garcia.
Nahisgutan usab sa tigom sa mga sakop sa CCCI ug sa MCCI-Selangor branch ang posibleng “trade mission” nga pagahimoon sa mga Sugboanong negosyante ngadto sa Malaysia ingon man ang posibleng pagpirma og “Sister Chamber Agreement”.
Apil na unya sa maong trade mission ang makigtambayayong sa mga Islamic financial institutions sa Selangor nga makaabag sa mga sSgboanong negosyante sa Sharia-compliant financing nga kapilian.
Lain mao ang paglusad og hiniusang forum ug seminar kabahin sa Islamic financing nga makatabang pag-edukar sa mga Sugboanong negosyante ga malagmit makatabang usab kanila sa natad sa real estate, inprastraktura, ug turismo.
Dugang pang katuyoan mao ang pagpahigayon sa kahigayonan nga motukod og mga negostyo tali sa Selangor ug sa Cebu City sa natad sa kalamboan sa turismo, Information Technology-Business Project Outsourcing, ug industriya sa pagkaong Halal. (Renante Socia Lada)
(Source: Cebu City PIO)