Samtang naghost ang Cebu sa ASEAN Summit Tourism Forum 2026, padayon ang kapulisan sa pagpahugot sa seguridad aron masiguro ang kaluwasan sa mga delegado, partisipante, ug sa katawhan. Atol sa maong mga lakang, nadakpan sa Argao Municipal Police Station ang usa ka suspek atol sa checkpoint operation sa National Highway, Barangay Poblacion, Argao, Cebu alas 8:30 sa buntag sa Enero 29, 2026.
Ang nadakpan mao ang alyas “Nognog,” 37 anyos, minyo ug residente sa Barangay Bug-ot, Argao. Nabantayan siya sa mga pulis nga nagmaneho og motorsiklo nga walay helmet ug side mirror. Sa dihang gi-inspeksyon, nakita sa kapulisan nga adunay pusil nga gisuksuk sa iyang hawak.
Human sa legal nga pagdakop ug pagsusi, narekober sa kapulisan ang usa ka 9mm nga pusil nga walay serial number, lima ka bala, ug dose ka sachet nga gituohang shabu nga may gibug-aton nga mga 2 gramos ug kantidad nga ₱13,600 sumala sa DDB. Gipahibalo dayon ang suspek sa hinungdan sa iyang pagdakop ug gibasahan sa iyang katungod sa balaod, dayon gidala sa Argao MPS alang sa hustong dokumentasyon. Ang tanang nakuha nga ebidensya gi-inventory ug gi-picture-an sa presensya sa suspek ug mga testigo.
Matod ni PCOL Abubakar Udang Mangelen Jr., Provincial Director sa Cebu Police Provincial Office, importante ang maong operasyon ilabi na karon nga nagpadayon ang ASEAN Summit. Giingon niya nga walay lugar ang ilegal nga pusil ug drogas sa komunidad, labi na sa panahon sa dagkong internasyonal nga kalihokan, ug prayoridad sa kapulisan ang kaluwasan sa tanan.
Atubangon sa suspek ang kaso sa RA 10591 o ilegal nga pagpanag-iya og pusil ug bala, ug RA 9165 o Dangerous Drugs Act. Padayon ang Cebu Police Provincial Office sa pagpahugot sa checkpoint operations ug aktibong pagbantay aron masiguro ang hilum, kahapsay, ug kaluwasan sa tanan atol sa ASEAN Summit.
Source: CPPO
I via Renante Socia Lada