Gibutyag ni Gobernador Gwendolyn Garcia atol sa miting uban sa mga nareelect, incoming, ug outgoing nga miyembro sa Cebu Provincial Board nga ang Kapitolyo sa Sugbo adunay kasamtangang ₱6.015 bilyon nga cash on hand ug nagpabiling walay utang sa bisan unsang institusyon pinansyal.
Sumala sa Provincial Treasurer’s Office, lakip sa mga tinubdan sa kita sa Kapitolyo mao ang negosyo sa probinsya, koleksyon sa buhis, ug bahin sa pondo gikan sa national government. Apil usab sa kita ang interes nga nakuha gikan sa mga overnight placement o mga bank deposit, nga sukad Hulyo 2024 nakatigum og ₱195.7 milyon.
Gipahibalo usab nga ang Cebu Province karon adunay ₱310 bilyon nga assets, hinungdan nga kini gihapon ang pinakadato nga probinsya sa tibuok Pilipinas.
Samtang nag-andam sila ni Bise Gobernador Hilario Davide III alang sa turnover ngadto sa bag-ong napiling mga opisyal, gipahimug-atan ni Gob. Garcia nga ang Sugbo nagpabiling number one sa 82 ka probinsya sa nasud.
Gipresentar usab ni Garcia ang mga programa sa iyang administrasyon nga gilauman niyang ipadayon sa bag-ong han-ay sa liderato sama sa Sugbo Kahanas, Sugbo Negosyo, Early Childhood Development (ECD), Caravan of Services, Sugbusog, SMB, ug uban pa.
Sa laing bahin, Bise Gobernador Davide mipasidungog sa iyang kauban sa Provincial Board ug mipahimangno sa mga bag-ong miyembro sa pagpadayon sa panaghiusa nga wala’y pagbahin-bahin sa majority ug minority bloc.
Mipasidunggan usab siya sa liderato ni Gov. Garcia nga nakapahiusa sa mga elected ug non-elected officials sa probinsya.
Sa laing bahin, si incoming Vice Governor Glenn Anthony Soco misiguro sa mga incoming board members nga magmando siya og usa ka konseho nga andam maminaw sa tanang tingog sa lalawigan.
Source: Cebu Provincial Capitol, PIO
I via Renante Socia Lada