Giawhag ni Gobernador Gwen Garcia ang tanang 51 ka Sanguniang Kabataan Federations sa Probinsiya sa Sugbo nga aktibong mosalmot sa gipabuhi nga school feeding program sa Kapitolyo.
Atol sa tigom sa Social Hall sa Kapitolyo karong adlawa Oktubre 29, giawhag sa Gobernador ang mga presidente sa SK Federation, pinangulohan ni SK Provincial Federation President ug ex-officio Board Member Loren Singco, nga moapil sa pagpangandam sa pagkaon alang sa ilang lokal nga mga estudyante.
Si Gobernador Gwen giubanan sa mga opisyal sa munisipyo ug distrito sa Basdiot Elementary School sa Moalboal alang sa tibuok probinsiya sa dungan nga paglusad sa Sugbo School Feeding Program Season 2 niadtong Oktubre 28, 2024
“Ang akong hangyo ninyo, SK Federation President sa kada lungsod, moapil sa school feeding program. Programa man gud ni sa mga batan-on, maong motabang mo,” gibutyag ni Governor Gwen.
Ubos sa programa, ang Kapitolyo namalit og bugas nga ipang-apod-apod dayon sa tanang 1,517 ka pampublikong tunghaan sa Probinsiya sa Sugbo.
Ang Makabenepisyo niini mao ang 966,481 ka na-enrol nga mga estudyante alang niining tuiga sa tingtungha, bisan unsa pa ang kahimtang sa nutrisyon, gikan sa Kindergarten hangtod sa Grade 12; tungod kay ang pagpakaon sa eskuylahan gitakda matag adlaw sa eskuylahan alang sa tibuuk nga tuig sa pagtungha, sa suod nga pakigtambayayong sa Asosasyon sa Ginikanan-Magtutudlo.
Ang programa nakakaplag usab og lig-on nga suporta gikan sa pribadong sektor, tungod kay ang San Miguel Foods midonar og 10,000 kilos nga premium Magnolia nga manok, samtang ang Century Pacific midonar og 48,720 ka lata sa Argentina beef loaf alang sa programa.
Ang Globe Telecom modonar og usa ka milyon ka pesos nga kantidad sa bugas; samtang ang Bureau of Customs Port of Cebu nihatag na sa ilang kontribusyon nga 300 ka sakong bugas alang sa programa.
Source: Cebu Provincial Capitol PIO
I via Renante Socia Lada
#rpndykccebu
#675hzamband
#mrpublicservice