Gipangulohan ni Cebu Governor Pamela Baricuatro ang Serbisyo Karaban alang sa mga residente sa ikaduhang distrito sa Sugbo niadtong Biyernes, Nobyembre 28, 2025. Gipahigayon kini sa Imeldo Gamallo Multipurpose Building sa Samboan, diin nagkatigom ang mga residente gikan sa Samboan ug mga silingang lungsod sama sa Santander, Oslob, Dalaguete ug ubang dapit sa distrito aron makapahimulos sa daghang serbisyo sa Kapitolyo.
Naglakip sa mga serbisyong gitanyag ang Provincial Social Welfare and Services Office, Provincial Legal Office, Provincial Veterinary Office, Provincial Health Office, Provincial Assessor’s Office, Provincial Agriculture Office, ug Provincial Tourism Office. Mitambong usab ang pipila ka ahensya sa nasyonal sama sa Pag-IBIG Fund, SSS, PSA, PCIC, LTO, DOLE, DILG ug daghan pa. Gihatagan usab og init nga pagkaon ang mga partisipante sa Cebu People’s Action Center, libre nga ice cream gikan sa LGU Samboan ug free haircut gikan sa Bureau of Fire Protection.
Gisuportahan usab ang kalihukan sa mga mayors sa ikaduhang distrito, lakip na sila Argao Mayor Allan Sesaldo, Acting Dalaguete Mayor Coca Osorio-Bustamante, Alcoy Mayor Eugene Singson, Boljoon Mayor Jojie Derama, Oslob Mayor Ronald Guaren, Santander Mayor Marites Buscato ug Provincial Board Members Dr. Stanley Caminero ug Raymond Calderon.
Sa iyang mensahe sa pagsugod, miingon si Mayor Tito Calderon nga natuman ni Gob. Baricuatro ang saad nga dalhon ang serbisyo sa Kapitolyo direkta sa katawhan. Gipasalamatan usab sa gobernadora ang tanang LGU sa distrito sa ilang padayon nga suporta, ug mipadayag nga ang sekreto sa maayong panggobyerno mao ang kanunay nga pagpaminaw sa katawhan.
Human sa Samboan, ang Serbisyo Karaban mopadayon sa Malabuyoc Evacuation Area karong Nobyembre 29 aron maghatag og serbisyo sa mga residente sa ikapito nga distrito sa Sugbo.
Source: Cebu Province PIO
I via Renante Socia Lada