Sa iyang paningkamot nga mapalig-on ang kampanya batok iligal nga drogas, gipahibalo ni Cebu Gobernor Pamela Baricuatro nga iyang buot ibalik sa full department status ang Cebu Provincial Anti-Drug Abuse Division (CPADAD).
Gihimo ang maong pahibalo atol sa miting uban sa mga opisyal sa Philippine Drug Enforcement Agency sa Central Visayas (PDEA-7), lakip na si Regional Director Joel Plaza, Operations Chief Milva Mojado, ug Provincial Officer Jonar Cuayzon.
Matod ni Gob. Baricuatro, kaniadto full department gyud ang CPADAD panahon ni kanhi Gobernador Hilario Davide III nga gipangulohan ni Ivy Durano, nga karon mao na ang bise-alkalde sa Danao City. Apan panahon sa administrasyon ni kanhi Gob. Gwen Garcia, gi-downgrade kini ngadto sa usa na lang ka division ubos sa Governor’s Office. Tungod niini, mikunhod usab ang ihap sa mga empleyado gikan sa 40 ngadto sa tulo na lang usa ka regular ug duha ka job order.
Gipadayag usab sa gobernador nga walay opisyal nga pangulo ang CPADAD karon, busa lisod para kanila ang pagpirma sa mga dokumento ug paglihok sa ilang mga responsibilidad.
Gidawat sa PDEA-7 ang inisyatiba sa gobernador. Matod ni Director Plaza, mas epektibo ang kampanya batok drogas kon lig-on ang panagtinabangay tali sa PDEA ug lokal nga panggamhanan.
Sa higayon nga marestore ang CPADAD isip usa ka department, gilauman nga mas mudaghan ang personnel, mas dako ang pondo, ug mas lig-on ang koordinasyon sa mga otoridad. Kini usa ka klaro nga lakang sa tinguha ni Gob. Baricuatro nga mapalig-on ang kaluwasan sa publiko ug mabuhing walay drogas ang Sugbo.
Source: Cebu Province PIO
I via Renante Socia Lada