Nadakpan dayon sa kapulisan ang usa ka suspetsado sa pagpangawat sulod ra sa duha ka oras human masuta ang insidente pinaagi sa CCTV footage, alas 11:40 sa gabii niadtong Septiyembre 15, 2025.
Base sa report, ang pagpangawat nahitabo pa sa Septiyembre 13 apan nadiskobrehan lang sa tag-iya pagkahuman niya motan-aw sa CCTV. Didto nakita ang suspek nga misulod ug gikawat ang mga gamit sa balay. Ang Talisay City Police Station ubos sa Cebu Police Provincial Office dayon mihimo og hot-pursuit operation ug nadakpan ang suspetsado alas 1:35 sa kadlawon, Septiyembre 16.
Nakuha gikan sa suspek ang pipila ka butang sama sa luxury watches, alahas ug electronic gadgets nga nagkantidad og ₱295,128.40. Apan adunay mga wala pa ma-recover sama sa cellphone, uban pang alahas ug kwarta nga moabot og ₱216,336.00.
Si PBGEN Redrico A. Maranan, Regional Director sa PRO-7, mipasidungog sa Talisay police sa ilang paspas nga aksyon. Matod pa niya, dakong tabang ang CCTV sa dali nga pag-ila ug pagdakop sa mga kriminal.
Ang suspetsado karon gipriso na sa Talisay Police Station ug pasakaan og kaso nga Robbery ubos sa Article 293 sa Revised Penal Code. Gipangayo gihapon sa kapulisan nga magpabilin ang katawhan nga mabinantayon ug magbutang og security measures sama sa CCTV aron maprotektahan ang ilang balay ug kabtangan.
Source: PRO7- PIO
I via Renante Socia Lada