Sa pag-andam sa paglusad sa Nationwide Roll-out sa Enhanced Managing Police Operations (EMPO) Challenge ug Simulation Exercise (SIMEX) karong Nobyembre 27, 2025, gipahugtan sa Cebu City Police Office (CCPO) ang ilang ka-andam sa operasyon pinaagi sa sunod-sunod nga simulation exercises aron mapalambo ang police response, mapaayo ang estratehiya, ug mapalig-on ang kalinaw ug kahapsay sa siyudad.
Uban sa lig-on ug aktibong liderato ni Officer-in-Charge PCOL GEORGE V. YLANAN, gipahigayon sa CCPO ang nagkalain-laing scenario-based simulations sama sa pag-responde sa bomb threat, pagdumala sa protest rally, hostage rescue operations, robbery incidents, ug ubang kritikal nga kahimtang nga nagkinahanglan og paspas ug hiniusa nga aksyon sa kapulisan.
Ang mga simulation kabahin sa komprehensibong pamaagi sa CCPO sa pagpalig-on sa managing police operations ilabina nga nagkadool ang holiday season ug ang Sinulog 2026.
Matag simulation gisundan og hugot nga critique ug assessment aron mailhan ang kusog, masulbad ang kahuyang, ug mapalambo pa ang operational strategies.
Bisan pa man nga simulated events kini, gipasiugda sa CCPO nga ilang gihimo kini sa pinakataas nga level sa seryoso ug strategic focus aron masiguro ang tukmang kahandam sa tinuod nga insidente.
Sa pagsunod sa gipahugot nga direktiba ni PRO7 Regional Director PBGEN REDRICO A. MARANAN, nagpatuman ang CCPO og hinlo, hiniusa, ug hugot nga lakang aron mokusog ang response capabilities sa kapulisan.
Kini nga mga paningkamot nagtinguha sa episyente, tukma sa oras, ug epektibong law enforcement operations ilabina sa pagdagsa sa mga kalihokan sa siyudad sa umaabot nga mga selebrasyon.
Gipasiguro ni PCOL Ylanan sa publiko nga padayon ang komitment sa CCPO sa pagmintinar sa kalinaw, kahapsay, ug seguridad. Iyaha usab gi-awhag ang katawhan sa pagreport dayon sa bisan unsang kadudahang suspect, tawo o butang aron dali matubag sa kapulisan ug mapadayon ang seguridad sa tanan.
Nag-awhag usab ang CCPO sa publiko nga magpabiling mabinantayon ug magtinabangay sa kapulisan aron masiguro ang luwas ug hapsay nga Cebu City alang sa mga residente ug bisita.
Source: CCPO
I via Renante Socia Lada