Nagpadayon ang higpit nga seguridad nga gipangulohan sa Cebu City Police Office (CCPO) ubos sa liderato ni Acting City Director PCOL Enrico Evangelista Figueroa atol sa ikaduhang adlaw sa 2025 Bar Examinations nga gihimo sa University of San Jose-Recoletos (USJ-R) Basak Campus karong Setyembre 10, 2025.
Sayong buntag pa lang, gibutangan na og mga police personnel ang nag-unang agianan palibot sa testing center, ilabina sa N. Bacalso Avenue. Alas 2:00 sa kadlawon, nagsugod na og duty ang mga pulis ug uban pang law enforcement agencies aron masiguro ang kalinaw ug kahapsay. Pagsugod sa alas 3:30, nisulod na ang mga examinees sa testing facility.
Gibutyag sa CCPO nga kapin 200 ka police personnel ang gi-deploy sa lugar aron maprotektahan ang kapin 1,300 ka examinees nga motake sa bar exams sulod sa tulo ka adlaw. Ang Cebu City usa sa 14 ka official testing centers nga gihatag og pag-ila sa Supreme Court.
Matod pa ni PCOL Figueroa, buhaton sa kapulisan ang tanan aron mahimong malinawon ug hapsay ang tibuok proseso sa eksaminasyon. Gipasalig usab niya nga andam ang CCPO sa bisan unsang sitwasyon nga mahimong mahitabo.
Pinaagi sa lig-on nga kooperasyon sa mga station commanders ug uban pang ahensya, naningkamot ang CCPO nga mapadayon ang integridad ug seguridad sa bar examinations sa dakbayan.
Source: CCPO
I via Renante Socia Lada