Gisiguro sa Cebu City Police Office (CCPO) ang malinawon ug luwas nga pagsugod sa 2025 Bar Examinations nga gihimo karong Septiyembre 7, 2025 sa University of San Jose-Recoletos (USJ-R) Basak Campus.
Pinangunahan ni Acting City Director PCOL Enrico Evangelista Figueroa, gilusad sa CCPO ang usa ka hugot nga security plan aron mapanalipdan ang mga examinees ug maseguro ang hapsay nga dagan sa eksaminasyon. Sayo palang sa buntag gideploy na ang kapulisan sa palibot sa testing site.
Gitan-aw usab ni Deputy City Director for Operations PLTCOL Miguel B. Andeza ang preparasyon ug pagmintinar sa kahapsay samtang ang mga police personnel gibutang sa North ug South streets daplin sa N. Bacalso Avenue. Alas 2:00 sa buntag nagsugod na sila sa pagbantay, samtang alas 3:30 sa kadlawon gisugdan ang pagpasulod sa mga examinee.
Duol 200 ka police personnel gikan sa CCPO ang gideploy aron mabantayan ang testing center nga usa sa 14 ka venue sa tibuok nasud. Gipatuman usab ang liquor ban sulod sa 100 metros palibot sa USJ-R gikan alas 9:00 sa gabii hangtod alas 10:00 sa gabii human sa exam.
Ang Business Permit and Licensing Office (BPLO) uban ang CCPO ug PROBE Team mao ang mag-monitor sa mga establisemento aron masiguro nga walay makalapas sa balaod, lakip na ang pagbaligya og ilimnon ug kasaba sa palibot.
Gipasalig ni PCOL Figueroa nga andam ug tibuok kasingkasing ang CCPO sa paghatag og seguridad alang sa kapin 1,300 ka examinees nga motake sa Bar Exams sulod sa tulo ka adlaw nga schedule.
Source: CCPO
I via Renante Socia Lada