Gipalig-on sa Cebu City Police Office (CCPO) ang ilang operasyon sa kagabhion pinaagi sa “Nightwatch Aggressive Patrol” nga gilusad gabii Septiyembre 17, 2026, gikan alas-9 sa gabii hangtod alas-12 sa tungang gabii.
Gipangulohan mismo ni Acting City Director PCOL Ricky C. Sumalde ang operasyon uban sa mga opisyal sa CCPO ug kapin 60 ka kapulisan, lakip ang mga personnel gikan sa Police Station 6, City Mobile Force Company, SWAT, CIU, CIDMU ug CDEU. Gipunting ang mga lugar sa Barangays Sawang Calero, Calamba ug Suba.
Niresulta ang operasyon sa pagkadakop sa 11 ka mga suspek. Usa ang nadakpan tungod sa paglapas sa Republic Act 10591 o balaod batok sa ilegal nga pagpanag-iya sa armas, diin nasakmit ang usa ka caliber .38 nga pusil pinaagi sa search warrant. Upat usab ang nadakpan tungod sa paglapas sa
Republic Act 9165 o Comprehensive Dangerous Drugs Act, samtang lima ang giapil sa kaso kalabot sa ilegal nga sugal ubos sa Presidential Decree 1602.
Gipatuman usab ang mga operasyon sama sa Oplan Bulabog, Oplan Galugad ug Oplan Bakal/Sita, ingon man ang police visibility ug pagpatuman sa mga ordinansa sa siyudad. Narekord usab ang mga paglapas nga naglakip sa tulo ka menor de edad, lima ka nag-inom sa pampublikong lugar, pito ka tawo nga walay hustong sapot sa public place, duha ka TCT ug 12 ka TOP.
Matud ni PCOL Sumalde, ang Nightwatch Aggressive Patrol usa ka pag-upgrade sa ilang estratehiya aron mas makita ug mas dali motubag ang kapulisan, ilabi na sa mga lugar nga mas kinahanglan og police presence panahon sa kagabhion.
Gipasabot niya nga magpabiling lig-on ang CCPO sa pagpatuman sa balaod, apan siguruhon gihapon nga ang tanang operasyon himuon sulod sa balaod ug respetado ang katungod sa matag indibidwal.
I via Renante Socia Lada