Gidayeg sa Cebu City Government ang Cebu City Police Office (CCPO) tungod sa ilang malampusong gipakusog nga operasyon batok sa krimen nga gihimo gikan Pebrero 2 hangtod 8, 2026 aron mapadayon ang kalinaw ug kahapsay sa siyudad.
Kini nga mga operasyon gihimo pinaagi sa Oplan Bulabog nga gisuportahan sa Oplan Baka-Sita, nga nagtumong sa pagpugong sa kriminalidad, pagpatuman sa mga balaod ug ordinansa, ug pagpanalipod sa kaluwasan sa katawhan.
Tungod sa maong operasyon, 11 ka indibidwal ang nadakpan tungod sa paglapas sa Section 11, Article II sa Republic Act 9165 o Comprehensive Dangerous Drugs Act.
Narekober usab sa kapulisan ang mga 13.11 gramos nga gidudahang shabu nga adunay gibanabana nga kantidad nga ₱89,148.
Gipasiugda sa Cebu City Government ang maayong trabaho sa CCPO ubos sa liderato ni Police Colonel George V. Ylanan, ug giila ang ilang dedikasyon sa pagpatuman sa balaod. Matod pa sa syudad nga dako ang natabang sa maong operasyon sa pagpalig-on sa kaluwasan ug kahapsay sa Cebu City, lakip na ang pagluwas sa pipila ka mga menor de edad.
Source: CCPO
I via Renante Socia Lada