Miapil ang Kagamhanan sa Probinsya sa Sugbo sa nasudnong earthquake drill niadtong Marso 12, alas 3:30 sa hapon. Ang mga opisyal ug empleyado sa kapitolyo mi-apil sa ensayo aron mas mapalambo ang ilang kahibalo sa hustong buhaton kung adunay linog.
Apil usab sa drill si Gob. Pamela Baricuatro uban sa kapin 20 ka mayor ug mga pangulo sa nagkalain-laing ahensya sa gobyerno. Gipahunong nila kadiyot ang ilang tigum bahin sa pagmonitor sa presyo sa mga palaliton aron makasalmot sa maong ehersisyo.
Sa giya sa Provincial Disaster Risk Reduction and Management Office, Office of Civil Defense ug Bureau of Fire Protection, gihimo sa mga partisipante ang “duck, cover, and hold” nga pamaagi. Human niini, dali silang mi-evacuate padulong sa mga gitakdang evacuation areas sa palibot sa kapitolyo.
Ang maong earthquake drill kabahin sa nationwide preparedness program aron maandam ang mga opisyal ug empleyado sa gobyerno kung adunay tinuod nga linog. Sumala sa mga otoridad, ang regular nga pagbansay sama niini makatabang aron malikayan ang kalisang ug makaluwas og kinabuhi kung adunay emerhensya.
Source: Cebu Province PIO
I via Renante Socia Lada