Ang Cebu Provincial Government nagpalig-on sa Laudate Deum Si’ Tree Park Program sa probinsya pinaagi sa bag-ong ordinansa nga gisugyot ni Provincial Board Member Stanley Caminero ug gi-aprobahan sa Provincial Board niadtong Disyembre 22, 2025.
Gisunod niini ang Executive Order No. 56 ni Governor Pamela Baricuatro ug naglatid sa polisiya, istruktura sa pagdumala, ug mga lakang para sa implementasyon sa programa. Apil sa ordinansa ang tulo ka co-authors: PB Members Neneth Reluya ug Jojo Bacaltos gikan sa First District sa Cebu, diin unang gipahigayon ang Laudate Deum Si’ Tree Park sa City of Naga niadtong Disyembre 8, 2025.
Ang programa nagtukod og mga green spaces nga punuan og native ug climate-resilient nga kahoy. Tumong niini ang pagbalik sa ecological balance, pagpalambo sa biodiversity, ug paghatag og lugar nga matun-an sa komunidad ang kamahinungdanon sa pag-amuma sa kalikupan.
Sa iyang mensahe sa paglusad sa parke, giingon ni Governor Baricuatro nga ang parke dili lang bahin sa kahoy, kundili bahin sa stewardship ug pagpanalipod sa kalikupan alang sa umaabot nga henerasyon.
Gipadayag sa gobernador nga ang proyekto usa ka pasalig sa malungtarong kaugmaon sa Cebu.
Source: Cebu Province PIO
I via Renante Socia Lada