Gipapahawa sa serbisyo sa Office of the Ombudsman si Noel Taylaran Dotillos, kasamtangang bise-mayor ug kanhi mayor sa lungsod sa Borbon, Cebu, human mapamatud-i nga siya nalambigit sa grave misconduct tungod sa iligal nga paggasto sa pondo sa lungsod ug walay pagtugot nga pagpang hire og trabaho.
Base sa desisyon sa Ombudsman nga gipagawas niadtong Hulyo 18, 2025, gisilotan si Dotillos pinaagi sa pagkanselar sa iyang civil service eligibility, permanenteng pagdili sa pagpanarbaho sa gobyerno, pagkawala sa benepisyo sa pagretiro, ug pagdili sa pagkuha og civil service exams. Kung dili mapatuman ang silot tungod sa iyang paghaw-as sa serbisyo, kini ilisan og multa nga tumbas sa iyang usa ka tuig nga sweldo nga bayaran sa Office of the Ombudsman.
Ang kaso nagsugod sa reklamo ni Emar Bascon Cuico, residente sa Borbon, nga nagsumbong batok kang Dotillos sa iligal nga paghatag og bonus niadtong 2019 ug sa pag-hire sa iyang asawa nga si Corazon Dotillos nga wala’y klarong awtorisasyon. Nagpagawas si Dotillos og ₱570,000 aron ihatag ang ₱10,000 bonus matag empleyado, bisan pa nga wala pa maaprubahan ang supplemental appropriation ordinance sa Sangguniang Bayan, nga usa ka klarong paglapas sa Local Government Code (RA 7160).
Gidugang pa sa imbestigasyon nga ang pagkuha og trabaho ni Corazon Dotillos, nga retirado nang municipal health officer, walay prior approval gikan sa konseho. Bisan pa nga adunay resolusyon nga nagratipika sa maong kontrata pagkahuman niini, giingon sa Ombudsman nga dili kini makapasig-uli sa sayop kay kinahanglan unta og daang pagtugot sa konseho.
Ang desisyon nagpakita nga ang mga lokal nga opisyal kinahanglan motuman sa saktong proseso sa paggasto sa pondo ug pagpang-hire, aron maprotektahan ang kasinatian ug kredibilidad sa lokal nga pamalaod.
I via Renante Socia Lada