Nasikop sa Bohol Provincial Police uban sa Tagbilaran City Police ang upat ka Chinese national human sa usa ka entrapment operation niadtong Sabado sa hapon, Enero 17, 2026, sa Barangay Cogon, Tagbilaran City.
Sumala sa kapolisan, ang mga suspek gituohang nangilad sa mga lokal nga residente pinaagi sa pagbaligya og peke nga mga gadget nga gi-presyohan og mahal. Sa operasyon, narekober sa mga otoridad ang mga cellphone, relo, ug kuwarta nga gituohang gigamit sa ilang iligal nga kalihokan.
Gipasalamatan ni Governor Aris Aumentado ang paspas ug maampingong aksyon sa kapolisan nga mitabang sa pagpanalipod sa katawhan ug pagmintinar sa kalinaw sa lalawigan.
Matod pa sa gobernador, dako ang papel sa PNP Bohol ug Tagbilaran City Police sa pagbatok sa mga langyaw nga sindikato nga nagtinguha sa pagpahimulos sa mga lumulupyo sa probinsya.
Padayon karon ang imbestigasyon sa kapolisan aron masuta kung adunay pa silay laing biktima ug kauban sa maong modus.
Source: Bohol PNP
I via Renante Socia Lada