Sa gihimo nga pakisusi sa Cebu City Police Office (CCPO) sa usa sa mga suspetsado sa pagpanulis sa duha ka Jewelry Pawnshop sa dakbyan sa Sugbo niadtong Agosto 8, 2024, nasayran nga lain pa untang dakong hugna sa pagpanulis ang himuon sa siyudad sa Sugbo.
Kana maoy gibutyag ni Cebu City Police Office Acting City Director PCOL Antonietto Cañete ngadto ni Cebu City Acting Mayor Raymond Alvin Garcia atol sa pag presentar sa suspetsado kagahapong adlawa Agosto 14, 2024.
Si Marcial Ponesto, 31 anyos ang panuigon, taga Barangay Pagsabungan, dakbayan sa Mandaue City, maoy suspetsado nga nagmaniho sa getaway vehicle sa 5 ka mga tulisan nga nitulis sa Macy’s Jewelry Store ug DGC D’ Gold Chain Jewelry Store diin P14 milyones nga kantidad sa alahas ang ilang nakuha.
Nasuta nga ang tag iya sa getaway vehicle base sa LTO registration gikan sa usa ka Police Master Sergeant nga na destino sa Luzon area.
Nasayran usab nga mga sakop sa Parohinog group ang mga suspetsado diin si Ponesto maoy ilang kontak sa Sugbo.
Sa pagkakaron gihulat nalang nga ma sang-at ang tukmang kaso batok sa mga suspetsado lakip ang tag iya sa maong sakyanan. (Renante Lada and Ting Joe Pepito)