Usa ka batan-ong pulis patay, human nadisgrasya ang gimanehong motorsiklo niini, kagahapon sa alas 12:09 sa kaadlawon, adlawng Domingo, Hulyo 21 sa Larena Street, Brgy. Poblacion, Guihulngan City.
Ang biktima naila nga si PLT John Dale De Roma Mayo, 25, ulitawo, nadestino sa 2nd Provincial Mobile Force Company (PMFC) 3rd Maneuver Platoon nga nakabase sa Brgy. Buenavista, sa nasampit nga syodad.
Sa imbestigasyon sa Guihulngan Police Station pinaagi ni PMSG Mickel Angelo Beli-ot, nasayran nga ang maong pulis gikan sa surveillance operation, sa Brgy. Poblacion, sakay sa iyang motorsiklo paingon pauli sa ilang campo sa Brgy. Buenavista
Apan pag-abot sa likoon nga dalan, nawad-an og kontrol ang maong biktima, ug na-overshoot hinungdan nga nidiretso kini ngadto sa sementadong comfort room nga nahimutang sa wala nga bahin sa dalan.
Daling gitabang sa Guihulngan CDRRMO rescue team ug gi dala sa Guihulngan District Hospital apan gi declarar sa attending Physician nga Dead on arrival (DOA) ang biktima. (Ting Joe Pepito & Renante Lada)