Niulbo ang dakong sunog nga niigo sa usa ka barko didto sa kadagatan sa Punta Engaño, Siyudad sa Lapu-Lapu.
Nadawat ang alarma sa sunog pasado alas 2:2O kagahapon sa hapon, Abril 28, 2023 diin nikabat og pipila ka oras ang pagrespondi sa maong sunog.
Ang barko nga MV Diamond Highway maoy naigo sa dunog samtang anaa kini sa ka baybayunan sa naasoy nga lugar. Mahinumduman nga ang maong barko nasangad niadtong tuig 2021 human niigo ang bagyong Odette (Rai) sa Pilipinas.
Sa imbestigasyon sa kabomberohan nasayran nga natingala nalang ang nagbantay sa maong barko nga adunay niulbo na kalayo sulod sa barko. Nagkahiusa ang mga sakop sa BFP, PCG, PNP ug LCDRRMO sa pagtubag sa maong sunog.
Aduna kini 30 ka mga trabahanti nga nagtrabaho sa sulod sa maong barko atong higayuna. Gituhuan sa kabomberohan nga tungod sa welding maoy hinungdan sa pagkasunog sa maong barko.
Sa pagkakaron gihimo pa ang dugang imbestigasyon ug pagsuta kung pilay danyos niini. (Renante Lada, photo courtesy by Arnulfo Giling)