Naligo sa kaugalingong dugo ang usa ka Barangray Tanod human gipusil sa duha ka mga wala matino nga mga suspetsado.
Nahitabo kini didto sulod sa iyang panimalay, nahimutang sa Barangay Sawang Calero, dakbayan sa Sugbo, pasado 1:00 sa niaging hapon, Hulyo 28, 2024.
Ang biktima giila sa Cebu City Police Office nga mao si Reynaldo Saavedra, hingkod ang panuigon, residenti rapud sa maong lugar.
Sa imbestigasyon sa kapulisan nasayran nga samtang nagpahuway ang biktima, gisulod kini sa duha ka mga lalaki nga naka helmet dayon sa walay daghang storya gipusil kini sa nagkadaiyang parti sa lawas na maoy hinungdan sa iyang kamatayon.
Ang kapulisan padayon pa sa ilang imbestigasyon ug ilang ipaubos sa background check ang biktima kung wala ba kini gikaaway o kaha gikalambigit nga ilegal nga binuhatan aron pagsuta kung unsay motibo sa maong krimin ug si kinsa ang nagpaluyo niini. (Renante Lada)