Gitugotan ni Acting Mayor Raymond Alvin Garcia ang hangyo sa Cebu City Sports Center (CCSC) management board nga aduna lang gihapoy bahin sa rubberized track oval nga abli alang sa publiko kung magsugod na ang pag-ayo niini. Kini human nibisita kaniya ang mga board members, nga gipangulohan ni CCSC manager Jovita Taburada, niadtong August 15, 2024, alang sa pagpanumpa sa duha ka bag-ong sakop sa board. Gilakip nalang sab nila pagpadangat ang maong hangyo atol sa okasyon.
Daan nang gipahibawo ni Acting Mayor Garcia nga sirad-an ang CCSC inigkahuman sa Pasigarbo sa Sugbo karong Agusto 25 ug 26 aron hingpit kining ipaayo.
Nahukman atol sa maong panagtagbo nga adunay bahin sa rubberized track oval nga ipagamit gihapon sa mga tawo samtang giayo ang lain nga bahin. Daan nang gihangop ang pag-abli sa CCSC ngadto sa publiko human sa pasiunang pag-ayo alang sa Palarong Pambansa niadtong Huly 6 ngadto sa 16.
Gidunganan hinuon ang maong pag-abli sa pahinumdom nga temporaryo lamang kini kay lagi sirad-an unta ang tibuok track oval human sa Pasigarbo. (Renante Socia Lada)
(Source: Cebu City PIO)