Nalandig sa tambalanan ang anak human gipusil sa mismo niyang amahan ug amahan nagpusil usab sa iyang kaugalingon.
Didto kini nahitabo sa Purok 7, Barangay Lamacan, lungsod sa Sibonga, Sugbo, pasado alas 9:00 kagabii, Hunyo 17, 2024.
Ang biktima giila sa Sibonga Police Station na mao si Emie Marie Gempesao Carbonel, 28 anyos ang panuigon, residenti rapud sa maong lugar.
Naila usab ang suspetsado na amahan nga mao si Amelito Aldava Carbonel, 52 anyos, nagpuyo rapud sa maong dapit.
Sa imbestigasyon sa kapulisan pinanguluhan sa ilang hepe na mao si Police Captain Fort Antony Valdez, nasayran na ilang girespondihan ang taho na adunay lalaki nga armado sa maong lugar.
Pipila palang ka metros sa wala pa sila naabot nakadungog sila og buto- buto sa armas de fuego sa balay nga gipuy-an sa biktima ug suspetsado.
Sa pag abot na nila ilang nakita na samaran ang anak nga naigo sa lubot ug ang amahan naligo sa dugo na adunay pinusilan sa ulo.
Nigawas sa imbestigasyon na giingnan sa anak ang amahan nga dili na muoli ang iyang inahan, sa kalagot niini gipusil ang lubot gamit ang 38 revolver.
Nasayran nga ang inahan nibiya sa ilang balay human nakakuha og barangay protection order batok sa suspetsado.
Sa ulahing kasayuran nabugtuan sa kinabuhi ang amahan kaganihan kadlawon didto sa tambalanan. (Renante Lada | Ting Joe Pepito)
(Source: Sibonga Police Station)