Naluwas ang usa ka inahan ug ang iyang 7-anyos nga anak human ang paspas ug hiniusang pag responde sa Cebu Police Provincial Office, Compostela Municipal Police Station, ug Danao SWAT Team, nakapahunong sa usa ka delikadong hostage situation sa Purok Tamprut, Barangay Poblacion, Compostela, Cebu, niadtong Nobyembre 17, 2025.
Mga alas 8:40 sa buntag, nadawat sa kapulisan sa usa ka tawag gikan sa usa ka nagkabahang residente nga misumbong nga adunay usa ka lalaki nga klaro nang wala sa husto tungod sa kasuko ug problema sa kwarta nagkandado sa iyang kwarto uban ang iyang kaipon ug ilang anak. Naghulga kini nga patyon ang duha gamit ang usa ka taas ug hait nga pana.
Dali nga miresponde ang Compostela Police ubos ni PMAJ Joseph Aquino ug nangayo dayon og suporta gikan sa Danao SWAT Team nga gipangulohan ni PLTCOL Henrix Bancoletta.
Pag-abot sa lugar, nasuta sa kapolisan nga seryoso ang hulga. Ang suspetsado, inubanan sa kasina ug problema sa kwarta, nagpadayon og hulga human mawala ang ayuda nfa kwarta nga para unta sa pag-ayo sa ilang balay nga nadaot sa bagyo tungod sa iyang pagkagumon sa online gambling.
Gisugdan sa kapulisan ang negosasyon subay sa crisis protocol, apan misamot ang tensyon kay nagpadayon ang suspetsado sa pagpugos ug hulga. Tungod sa kalisod sa sitwasyon, naghimo og kontroladong pagsulod ang SWAT ug kapolisan, ug malampuson nilang na-subdue ang suspetsado nga walay bisan kinsa ang naangol, apil na ang mga biktima.
Nakuha sa kapolisan ang hait nga pana nga gigamit sa paghulga. Ang 33-anyos nga suspetsado gidala sa Compostela Police Station ug gihatagan sa iyang Miranda Rights ug Anti-Torture Law reminders.
Ang inahan (29 anyos) ug ang 7-anyos nga bata naluwas ug gihatagan na karon og tabang.
Sa pamahayag ni PCOL Abubakar Udang Mangelen Jr., iyang giingon nagpamatood kini nga disiplina, kaisog, ug propesyonalismo ang pundasyon sa ilang serbisyo. Dugang niya, ang hostage rescue kinahanglan og husto nga timing ug pagpugong, ug gipakita kini sa ilang team, ang pagpreserbar sa kinabuhi mao gyud ang labing una.
Gipasabot usab niya nga kini nga kalampusan nagsubay sa baruganan ni PBGEN Redrico A. Maranan ug sa sugo ni Cebu Governor Pamela Baricuatro nga hugot nga misupak sa tanang klase sa krimen sa probinsya.
Nagpasalig ang Cebu PPO nga padayon silang alerto ug andam motubag sa bisan unsang hulga gikan sa panimalay hangtod sa dagkong insidente uban ang integridad, disiplina, ug tinud-anay nga pagserbisyo alang sa katawhan.
Source: CPPO
I via Renante Socia Lada
