Nagsugod na ang makalipay nga kahimanan sa Cebu Provincial Capitol sa Escario Street pinaagi sa paglusad sa Pasko sa Kapitolyo: Agri-Fishery Trade Fair, nga nagdala ug dugang kasadya sa panahon sa Pasko.
Ang trade fair molungtad gikan Disyembre 15 hangtod 19, sugod alas-7 sa buntag hangtod alas-8 sa gabii (Lunes hangtod Biyernes). Dinhi ipakita ang lain-laing preskong produkto sa agrikultura ug pangisdaan gikan sa nagkadaiyang lugar sa Sugbo, lakip na ang lokal nga hinimo sama sa bantugang sandalyas sa Carcar, mga hinabol sa Sogod, mga gamit pangbalay, ug daghan pa.
Apil sa kalihokan ang mga exhibitors gikan sa LGUs ug pribadong sektor, nga gilauman nga modani sa daghang Sugbuanon nga gustong mopalit ug makatilaw sa mga produkto sa probinsya bisag naa ra sa siyudad.
Usa sa mga pinaka gipasiugda nga bahin sa trade fair mao ang parol-making contest, diin makigkompetensya ang mga partisipante alang sa dagkong premyo gikan sa Provincial Government.
Kini nga Pasko, makasinati ang publiko sa bahandi sa matag lungsod ug soyudad sa Sugbo, tanang lami ug kultura, anaa na sa kasingkasing sa siyudad.
Source: Cebu Province PIO
I via Renante Socia Lada