Adunay nakitang kakuwangan habig sa mga sakop sa Cebu City Disaster Risk Reduction and Management Office (CCDRRMO) nga maoy nitubag sa alarma kabahin niadtong babaye nga nanganak daplin sa aseras sa Gen. Maxilom Avenue kagahapong adlawa, Agusto 14, 2024.
Mao kini ang resulta sa pasiunang pakisusi nga gihimo ni Acting Cebu City Mayor Raymond Alvin N. Garcia kalabot sa kamatayon ni Mary Ann Tampos, 35, ug sa masuso nga iyang gipakatawo daplin sa karsada.
Dali nga gipaimbistigar sa acting mayor ang hitabo pinaagi sa pagpatawag nila ni Portia Basmayor, labaw sa Department of Social Welfare and Services; Raquel Arce, labaw sa Cebu City Transportation Office; ug ni Atty Kristine Batucan, city administrator.
Gipahibawo usab ni Acting Mayor Garcia, nga moayuda siya aron mapahiluna ang mga namatay ug mohatag usab siya og hinabang pinansiyal.
Sigon sa balita, patay nang daan ang masuso dihang nigawas sa tago-angkan ni Tampos, nga giingong pugsanong namalibad nga dili magpadala sa tambalanan. (Renante Socia Lada)
(Source: Cebu City PIO)