Gipusil patay ang usa ka abogado kagahapon sa buntag, Huwebes, Disyembre 11, 2025, sa Sacris Road, Barangay Bakilid, Mandaue City. Ang biktima giila nga si Atty. Duke Ramil Perral Lincuna, usa ka Certified Public Accountant (CPA) ug examiner sa Bureau of Internal Revenue (BIR). Siya gideklarar nga Dead on Arrival pag-abot sa ospital.
Nagmaneho si Atty. Lincuna sa iyang black Isuzu Crosswind Sportivo pasado alas 5:00 sa kabuntagon sa dihang kalit siyang gipusil sa duha ka lalaki nga nagsakay ug motorsiklo. Gireport sa kapulisan nga miigo ang bala sa ulo ug nawong sa abogado, hinungdan nga nabuslot ang bintana sa iyang sakyanan ug misangpot sa iyang hinanaling kamatayon.
Tungod sa ka-mingaw sa lugar atol sa maong oras, dali ra nga nakalayas ang mga suspek human sa insidente. Wala pa gihapon matino ang motibo sa pagpusil. Padayon ang imbestigasyon sa Mandaue City Police Office aron makuha ang CCTV footage ug makapangita og posibleng lead sa pag-ila sa mga responsable.
Sumala ni LTCOL Mercy Villaro, spokesperson sa MCPO, si Atty. Lincuna gahupot ug dagkong kaso ug business accounts sa ilang buhatan, apan dili pa matino kung konektado kini sa krimen. Giawhag usab sa MCPO ang publiko nga motabang ug motug-an sa bisan unsang impormasyon nga makatabang sa pagsulbad sa kaso.
Samtang ang Integrated Bar of the Philippines (IBP) mipagawas ug pamahayag nga nagkondenar sa pagpamusil sa abogado ug nangayo og tukmang hustisya. Narekober sa crime scene ang pipila ka basiyo sa bala sa wala pa matino nga kalibre samtang nagpadayon ang forensic examination.
I via Renante Socia Lada