Lima ka gatos ka mga delegado gikan sa 47 ka nasod sa Asia-Pacific region ang magtapok sa Lapu-Lapu City karong Oktubre 2024, alang sa 5 ka adlaw nga DGCA 2024 Philippines conference.
Si Mayor Junard “Ahong” Chan maoy host sa 59th Conference of Directors General of Civil Aviation sa Asia-Pacific region gikan Oktubre 14 hangtod 18, 2024, didto sa Dusit Thani Mactan Cebu Hotel, nga nahimutang sa Barangay Punta Engaño, dakbayan sa Lapu-Lapu.
Sa nasayran nga ang ubang kalingawan ug mga kalihokan, ipahigayon sa palibot nga mga hotel ug resort sa siyudad.
Ang Mayor’s secretary nga si Atty. Misaellee Tejano nakigtagbo sa technical working group niadtong Huwebes. Apil sa maong tigom si Atty. Jinky Zaragosa-Ang, CAAP legal officer, ug Chief Administrator, aron ipahibalo sa grupo ang umaabot nga dakong kalihokan.
Ang pag-host sa komperensya sa Pilipinas, partikular sa dakbayan sa Lapu-Lapu, gisugat sa kadasig gikan sa lain-laing member states sa miaging tuig.
Si International Civil Aviation Organization (ICAO) Secretary General Juan Carlos Salazar niingon, “Congratulations, and thank you, Philippines, for hosting the DGCA in Cebu next year. Kaming tanan naghinam-hinam nga makaadto didto.
” Si Salazar maoy mahimong keynote guest niining umaabot nga conference. Gawas sa mga opisyal sa DGCA gikan sa Asia-Pacific region, motambong usab ang mga civil aviation officials gikan sa France ug United States of America, sumala ni Ang. Ang Bangladesh nag-host sa ika-58 nga komperensya sa DGCA sa miaging tuig.
Ang DGCA mao ang tinuig nga panagtapok sa mga Directors General sa Civil Aviation sa rehiyon sa Asia-Pacific. Ang mga diskusyon ug kiliran nga mga miting magpunting sa lainlaing mga hilisgutan, lakip ang kaluwasan sa abyon, seguridad sa abyon, pag-navigate sa kahanginan, abyasyon ug kalikopan, ug ang pag-uswag sa ekonomiya sa transportasyon sa kahanginan, ug uban pa.
Misalmot sa TWG meeting ang mga representante ug mga hepe gikan sa nagkalain-laing departamento sa Syudad, lakip na ang traffic, engineering, tourism, performing arts, clean and green, ang clearing team, DRRMO, Public Information Office (PIO), City Veterinary Office, aron paghawan sa mga saag nga mananap. subay sa mga rota. Siguraduhon usab sa kapulisan sa dakbayan ang seguridad atol sa maong kalihukan.
Dugang coordinating meetings ang mosunod aron maseguro ang malinawon ug hapsay nga pag-host sa Asia-Pacific conference sa Lapu-Lapu City. (Renante Socia Lada)
(Source: Lapu-Lapu City PIO)