Nakadakop og 394 ka mga suspetsado ang Police Regional Office 7 (PRO7) atol sa sunod-sunod nga anti-krimen nga operasyon sa tibuok Central Visayas gikan Marso 22 hangtod 28, 2026. Kini kabahin sa gipakusog nga pagpangandam sa seguridad alang sa Semana Santa.
Sa kinatibuk-an nga gidakop, 160 ka indibidwal ang nasikop sa anti-illegal drug operations, diin narekober ang 2,616.16 gramos nga gidudahang shabu nga nagkantidad og kapin ₱17.7 milyon.
Sa kampanya batok sa ilegal nga armas, 25 ka tawo ang nadakpan ug nakuhaan og 49 ka armas, usa ka explosive device, ug 80 ka bala.
Samtang sa operasyon batok sa ilegal nga sugal, 119 ka indibidwal ang nasikop ug narekober ang ₱18,408 nga pusta.
Dugang pa, 90 ka mga wanted persons ang nadakpan, lakip na ang 18 ka Most Wanted Persons ug 72 ka uban pang gipangita sa kapulisan.
Matod ni PRO7 Regional Director PBGen Redrico A. Maranan, ang padayon nga operasyon batok sa krimen kabahin sa ilang lakang aron maseguro nga malinawon ug luwas ang pagsaulog sa Semana Santa.
Gisiguro usab niya nga naka-alerto gihapon ang kapulisan ug padayon nga gipakusgan ang seguridad sa mga simbahan, pilgrimage sites, transport terminals, ug uban pang lugar nga gilauman daghan og tawo atol sa Semana Santa.
Source: PRO7 PIO
I via Renante Socia Lada