Nagpadala og 325 ka bag-ong medical ug non-medical personnel ang Provincial Government sa Cebu ngadto sa 10 ka ospital nga gipadagan sa Kapitolyo, aron mapalig-on ang serbisyo nga panglawas sa probinsya.
Kini kabahin sa pagtuman sa saad ni Gobernador Pamela Baricuatro nga unahon ang sektor sa panglawas ug sigurohon nga adunay igo nga kawani ang mga pampublikong ospital, ilabi na sa mga lungsod ug layo nga komunidad.
Pinakadaghan og nadawat nga personnel ang Cebu Provincial Hospital–Danao nga adunay 50 ka bag-ong kawani, gisundan sa Bantayan District Hospital (48) ug Tuburan District Hospital (45). Ang uban pang ospital nga nadugangan og personnel mao ang Barili, San Francisco sa Camotes, Argao, Oslob, Sogod, Malabuyoc ug Minglanilla.
Matud sa Kapitolyo, kini nga dako nga hiring nagpaila sa people-centered nga programa sa gobernador, aron mas paspas ug mas maayong serbisyo ang mahatag sa mga pasyente, ug aron matabangan ang kakulang sa healthcare workers sa mga ospital sa probinsya.
Gipaabot usab nga sa mosunod nga mga adlaw, magpahibalo pa ang Provincial Capitol sa pagkuha og dugang nga personnel para sa unom pa ka ospital, isip padayon nga pagpalig-on sa public healthcare system sa tibuok Cebu.
Gidasig ang publiko nga magpabiling updated sa sunod nga mga pahibalo sa Kapitolyo.
SOURCE: Cebu Provincial Health Updates / Capitol PIO
I via Renante Socia Lada