Cebu City – Gisikop sa National Bureau of Investigation Cebu District Office (NBI-CEBDO) sa syudad sa Mandaue ang 20 ka mga security guards (SGs) nga nag bantay sa giingong illegally claimed area sa Purok Tambis, Barangay Umapad, Lunes, Abril 25, 2022.
Gibutyag ni Agent-in-charge Arnel Pura nga ang Meniroses Security Agency diin konektado ang maong mga gwardya walay permit gikan sa Commission on Elections nga ma excempt sa Comelec gun ban.
Nasakmit sa NBI ang 10 ka shotguns, 12 ka revolvers, ang mga bala gikan sa mga SGs.
Sutaon pa ang mga armas kong ang mga serial numbers na defaced ba.
Gidala ang mga gwardya ngadto sa buhatan sa NBI sa dugang pangutana.
Nagdumili paghatag sa ilang pamahayag ang personnel sa Meniroses Security Agency.
Matod ni Pura nga ilang pakisayran ang usa ka Jerome kinsa maoy giingong nag hire sa security agency.
Gipahibaw ni Pura nga mireklamo ang tag-iya sa 80 hektarya nga luna ug gipasanginlan nga nang harass ang mga gwardya nga gi hire sa wala pa mailhing claimant.
Giangkon niini nga ang complainants dunay tax declaration ug titulo sa yuta nga gi confirm sa City Assesor’s Office nga balido.
Giingong pinaagi sa pwersa ang pagkuha sa property.
Gisaysay sa opisyal nga basi sa suwat-reklamo nga gipadangat ngadto nila, nga pasado alas 10 sa gabii niadtong Enero, gi take over sa mga gwardya ang maong property.
Nagkanayon si Pura ang suwat gipadala ngadto sa Office of the Department of Justice ug gi refer sa NBI.
Sigon pa ni Pura nga gawas sa mga tag-iya, nakadawat sab sila ug mga reklamo sa mga residente.
Suma pa niini nga gidid-an ang mga residente pag agi ngadto sa national road sa Sitio Laray.
“Na suffer gyud mi tanan, gihold nila ang mga materyales panahon sa Odette kay dili nila palutson. Mao to gianhi sa akoang konsehal kay luoy kaayong mga tawo nga nawad-an na gale’g balay,” mensahi ni Barangay Captain Nelson Rubio.
Usa sa mga nanag-iya ug luna, Geminiano Vasquez, kinsa mi donate ug road right of way, mipadayag sa iyang kalipay nga nasulbad ang problema.
Gawas sa kalapasan sa Comelec gun ban, mamahimong mag-atubang sab ug laing mga kaso ang mga gwardya, sama sa grave threats, usurpation of real rights ug illegal possession of firearms.
Dugang pahibaw ni Pura nga accountable sab ang security agency sa maong hitabo.
Dili kini maoy unang higayon nga dunay mitumaw nga issue labot sa illegal claimants sa syudad sa Mandaue.
Sa Barangay Paknaan, mokabat ug 45 hektarya nga timberland nga gipanag-iya sa kagamhanan sa Mandaue, ang giingong gi-angkon sa usa ka Raul Canoy, kinsa gisikop sab sa NBI niadtong unang semana sa Abril.
Naka pyansa hinoon si Canoy.
Duna say duha ka hektarya nga luna sa syudad dool sa Pajara Park sa Barangay Umapad ang giingong giangkon sab sa wala pa mailhi nga claimant.
“Rampant ni karun because booming ang atoang Mandaue, national road ni nganong ari sila mo claim kilid sa national highway because after three years, three year’s from now grabe na ni (progress) kung makalusot ang grupo (claimant) ani makalusot sila,” pahibaw ni Pura. (Jhon Tadlip)
(News & photo courtesy of National Bureau of Investigation)